सुरू आहेत का ठोके अता हेही कळत नाही

सुरू आहेत का ठोके अता हेही कळत नाही
ह्रदय शाबूत असल्याचा पुरावा सापडत नाही

दिली फेकून मीही शेवटी ती फाटकी चप्पल
असू दे वाट काटेरी फरक आता पडत नाही

अताशा फेसबुकवर नेहमी असतो पडिक आम्ही
तसे तर आपल्यांसोबत घडीभरही बसत नाही

कुठे असतील ते रॅपर्स उष्ट्या चॉकलेटांचे
तिलाही आठवत नाही मलाही आठवत नाही

तसे तर राहते आईविनाही लेकरू तान्हे
कुणावाचून कोणाचे जरासेही अडत नाही

जरा चिमटीत येतो शेर आणिक वृत्त गडबडते
करू मी काय गझलेचे मला आता सुचत नाही

अमोल शिरसाट