ठेवला खड्डा असा हा उथळ कोणी
मार्ग आहे काढला मग सरळ कोणी
ओढले यात्रेत होते जवळ कोणी
पाडली पोरीस आहे भुरळ कोणी
थांबली होती कधीची भूक दारी
वाढला मग एक तुकडा सढळ कोणी
खोलवर होते तिथे निर्माल्य कुजले
थांबले नाही नदीच्या जवळ कोणी
तापले वातावरण भट्टी प्रमाणे
ओकतो आहे हवेवर गरळ कोणी
ती झऱ्याचा चेहरा लावून आली
पाहिले आहे असे का नितळ कोणी
राहिली मागे खुन्याची सावली की
ठेवला आहे पुरावा सबळ कोणी?
आतल्या भिंती किती भेगाळलेल्या
मारली आहे मनावर कुदळ कोणी
चित्र आले वेगळे डोळ्यांपुढे की
घातले डोळ्यात आहे कुसळ कोणी
© अमोल शिरसाट
कोणत्याही टिप्पण्‍या नाहीत:
टिप्पणी पोस्ट करा